O LIBRO DE HISVEGA FINALISTA DOS PREMIOS DA AGE

Os editores galegos entregan os Premios da Edición 2008 o próximo 19 de decembro en Vigo

10/12/2008 O gremio editorial galego celebrará o próximo 19 de decembro ás 20:00 horas a IV Noite da Edición, unha gala coa que a Asociación Galega de Editores (AGE) pretende reunir anualmente a todos aqueles que traballan o día a día da realidade material do libro, a súa produción e a súa edición e na que se entregarán os Premios da Edición 2008, concedidos polos propios editores. O evento, patrocinado polo Centro Español de Derechos Reprográficos (CEDRO), terá lugar no Verbum- Casa das Palabras de Vigo e está previsto que a el acodan os profesionais do sector e destacadas autoridades do mundo do libro, a cultura e a política en Galicia.

Nesta IV Noite da Edición serán homenaxeados no apartado da Edición Histórica os fundadores da Asociación Galega de Editores, que celebra neste ano 2008 vinte e cinco anos de traxectoria dende a súa fundación en 1983. Asemade entregaranse previamente á cea os premios creados pola AGE para recoñecer a excelencia do traballo dos compañeiros editores e dos integrantes doutros colectivos que se distinguiron ó longo do ano 2008 polo seu labor a favor do mundo do libro ou a promoción da lectura.

Premios e finalistas

Este ano o Premio Francisco Fernández del Riego, co que se pretende recoñecer o traballo realizado por unha persoa ou colectivo de persoas, entidade ou institución das que colaboran co sector editorial ou que participan na promoción do libro editado en lingua galega e da propia lingua, recaeu na empresa GADISA pola tarefa desenvolvida a prol do recoñecemento da cultura galega.

Na actualidade os membros da Asociación Galega de Editores están a efectuar as súas votacións para cada elexir entre os finalistas a cada un dos gañadores das cinco categorías restantes contempladas nos Premios da Edición 2008, dos que non se saberá a identidade ata o propio día da gala. Os finalistas para cada unha das categorías son:

Premio Ánxel Casal ao Libro do ano, co que se pretende recoñecer un libro editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A arquitectura en Galiza: Aproximación á realidade arquitectónica xeral de Galiza dende a Prehistoria ata os nosos días, de Manuel Torres Búa (Edicións Nigra Trea), A conta atrás, de Carlos Portela (Faktoría K de Libros), A vida nova de Madame Bovary, de Xosé Carlos Caneiro (Editorial Galaxia), Caderno de animalista, de Antom Fortes (OQO Editora), Fin de século en Palestina, de Miguel Anxo Murado (Editorial Galaxia), O libro das viaxes imaxinarias, de Xabier P. Docampo (Edicións Xerais de Galicia), e Os animais domésticos na Historia de Galicia, de Diego Conde e José M. Vázquez Varela (3C3 Editores).

Premio Xosé Neira Vilas ao Libro infantil e xuvenil do ano, co que se pretende recoñecer un libro infantil ou xuvenil editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A pastelaría de Dona Remedios, de Agustín Fernández Paz (Rodeira-Edebé), Caracois, de Armando Quintero (OQO Editora), Imaxina animais, de Xosé Ballesteros (Kalandraka Editora), O ladrón de palabras, de Anxo Fariña (Edicións A Nosa Terra) e PAlAbrAs brAncAs, de Elvira Riveiro Tobío (Edicións Xerais de Galicia).

Premio Lois Tobío ao Libro traducido do 2008, co que se pretende recoñecer un libro traducido para o galego e publicado polos membros da AGE entre o 1 de decembro de 2007 e o 30 de novembro de 2008. Os finalistas son A fabulosa lenda do Rei Artur, traducido por Isabel Soto e Xabier Senín (Rodeira-Edebé), As flores do mal, traducido por Gonzalo Navaza (Editorial Galaxia), Cantos e fragmentos, traducido por Raúl Gómez Pato (Edicións Positivas), Deshonra, traducido por Moisés Barcía (Rinoceronte Editora), Eu servín ao Rei de Inglaterra, traducido por Fernando de Castro (Rinoceronte Editora), Lolita, traducido por Xesús Fraga (Faktoría K de Libros), e Mal de escola, traducido por Xabier Senín e Isabel Soto (Edicións Xerais de Galicia).

Premio Isaac Díaz Pardo ao Libro ilustrado do 2008, co que se pretende recoñecer un libro ilustrado editado polos membros da AGE e publicado orixinalmente en lingua galega entre o 1 de decembro de 2007 e o 30 de novembro de 2008. Os finalistas son A fabulosa lenda do Rei Artur, ilustrado por Francesc Rovira (Rodeira-Edebé), Celso Emilio Ferreiro. Selección poética, ilustrado por Baldo Ramos (Faktoría K de Libros), O libro das viaxes imaxinarias, ilustrado por Xosé Cobas (Edicións Xerais de Galicia), Rosalía de Castro. Selección poética, ilustrado por Belén Padrón (Faktoría K de Libros), e Terra Libre, ilustrado por Fran Jaraba (Edicións Xerais de Galicia).

Premio Xosé María Álvarez Blázquez ao autor ou autora do ano, co que se pretende recoñecer o traballo realizado por un autor ou unha autora, ou colectivo de autores/as, en lingua galega durante 2008. Os finalistas son Agustín Fernández Paz, Justo Beramendi e Miguel Anxo Murado.

Os premios non teñen dotación económica, mais farase entrega no acto dunha peza escultórica numerada a cada un dos galardoados.

Fonte: AGE